Bloed en doodslag in Oekraïne

Geskryf deur Juhan van Alten, VGK Pretoria

Almal het in die afgelope jaar en 'n half gehoor van die oorlog in Oekraïne, maar nie almal is op hoogte van die huidige oorlogsgebeure nie.

Die kerk in Oekraïne

Die meeste Christene het vanaf die ooste van Oekraïne na die weste van Oekraïne, of na Europa, gevlug. Dit het veroorsaak dat die kerke in die weste van Oekraïne volgestroom het met gelowiges. Die oorblywende kerke in die ooste speel 'n groot rol in die samelewing. Mense gaan daarheen om óf kos óf elektrisiteit te ontvang omdat die kerke kragopwekkers het. Die kerke in die weste van Oekraïne het laat weet dat hulle nie genoeg Bybels het nie, en die Westerse samelewing probeer daarom om meer Bybels (en ander literatuur) in Oekraïens te vertaal.

'n Groot rede vir die oorlog in Oekraïne is dat Poetin voel dat Oekraïne regtens deel van Rusland moet wees. En 'n groot deel van die Oekraïense en Russiese kultuur is gesentreer rondom die Oosters-Ortodokse kerk. Maar nadat die oorlog – eers in 2014 en later in 2022 – begin het, het die Oosters-Ortodokse kerke in Oekraïne hulself van die kerke in Rusland begin afskei. Wat Poetin in wese probeer doen, is om die ou Sowjetunie te herstel.

Wagner-rebellie

Op 23 Junie 2023 het die Wagner-groep, 'n privaat Russiese huursoldaatmag, 'n rebellie teen Rusland uitgevoer waar hulle na die hoofstad, Moskou, opgeruk het. Die rebellie het net ’n dag geduur. Danksy die president van Belarus kon die Wagner-leier en Poetin ’n ooreenkoms bereik waarvolgens die Wagner-leier in Belarus ‘n heenkome kon vind. Hierdie rebellie het groot skokgolwe oor die wêreld gestuur en het die kwesbaarheid van Poetin se regime getoon.

Oekraïense teenaanval

Sedert die oorlog begin het, het Oekraïne hoofsaaklik op die verdediging gebly. Vroeg in Junie het Oekraïne egter met hulle langverwagte teenaanval begin, maar hul suksesse was tot dusver nog nie so groot soos wat die meeste mense gehoop het nie. Daar was egter 'n paar klein oorwinnings vir Oekraïne.

Graanooreenkoms

Rusland het onlangs die graanooreenkoms beëindig, waarvolgens Oekraïne toegelaat is om graan via die Swart See en die Bosporus uit te voer. Poetin het te kenne gegee dat hy bereid is om na die ooreenkoms terug te keer as daar aan sy eise voldoen word. Maar die onlangse missiel-aanvalle op die hawe van Odessa laat mens wonder of hy regtig bereid is om terug te keer na die ooreenkoms. Dit is dalk eerder so dat hy met sy woorde probeer om 'n potensiële verlies aan politieke steun vanuit Afrika teen te gaan, want Afrika-lande word veral geraak deur hierdie gebrek aan graan-uitvoere.
Na die Russiese aanvalle op Oekraïne se hawens is daar ‘n opeenhoping van skepe op belangrike sytakke van die Donau-rivier. Data toon dat ten minste 30 skepe by Musura Baai in die Swart See anker uitgegooi het – hierdie baai lei weer na 'n kanaal wat met Izmail verbind is. Daar was ten minste 20 skepe geanker op die waterweg wat na Izmail lei. Hierdie rivier en sy uitmonding is Oekraïne se laaste oorblywende waterweg vir graan-uitvoere.

Mislukte sluipmoordpoging op die Oekraïense president

'n Vermeende vroulike informant vir Rusland is gearresteer in verband met 'n komplot om die Oekraïense president Volodymyr Zelensky te vermoor. Die Oekraïense Veiligheidsdiens (SBU) het gesê hulle het “intelligensie bekom” oor Zelensky se beplande besoek aan Mykolaiv aan die einde van Julie, waarby die Russe ‘n lugaanval beplan het om die president dood te maak. SBU-agente het egter inligting oor die “ondermynende aktiwiteite van die verdagte” bekom en bykomende veiligheidsmaatreëls ingestel, waardeur die komplot in die wiele gery is. Deurdat hulle die kommunikasie van hierdie vrou gemonitor het, het die SBU vasgestel dat sy ook die taak gehad het om die ligging van elektroniese oorlogvoeringstelsels en pakhuise met ammunisie van die Oekraïense leër te identifiseer. Sy het na bewering na die betrokke gebiede gereis en die ligging van Oekraïense teikens verfilm.

Die oorlog in Oekraïne is nog ernstig aan die gang, met geen duidelike oorwinnaar of einde in sig nie. Net die Here is in beheer en Hy sal bepaal wie die oorwinnaar sal wees.

Olielamp links: Instagram | Facebook | Skryf vir ons! | Meer oor die Olielamp