Moderne wolwe in skaapskleding

Geskryf deur Phillizè de Jong, VGK Bellville

Die skrifgedeelte 2 Petrus 2:1-3 waarsku ons teen die aanhoudende dreiging van valse leraars binne die Christelike gemeenskap. Hierdie leraars is bedrieglik en versprei leerstellings wat nie gegrond is op die waarheid van die Bybel nie, maar eerder op selfgemaakte idees en wêreldse denke. Hulle vermom hulself as herders, maar in werklikheid is hulle wolwe wat die kudde van God aanval met valse leringe. (Handelinge 20:29-30)

Petrus gee duidelike redes waarom ons moet waak teen hierdie valse leraars. Eerstens, hulle is ‘n direkte bedreiging vir die kinders van God. Hulle kom met versinde argumente en probeer wêreldse idees in die Bybel insmokkel, deur die ware betekenis van die Skrif te verdraai. Hulle verander die boodskap van liefde na ‘n boodskap van selfliefde en egoïsme, wat teenstrydig is met die ware leer van Christus.

Daarom is dit van kritieke belang dat elke gelowige die Bybel ken, verstaan, en dit in hulle lewens toepas. Dit is ons riglyn en beskerming teen dwaling. Deur vas te hou aan die onveranderlike waarheid van God se Woord, kan ons valse leer herken en weerstaan en sodoende, deur die werking van die Heilige Gees, onsself en ander beskerm teen die vernietigende invloed daarvan.

Die skrifgedeelte 2 Petrus 2:10-22 bied 'n indringende blik op die aard van valse leraars en ‘n waarskuwing om hulle te herken en te vermy. Hierdie individue is arrogant, wellustig en gierig. Hulle gebruik hul welsprekendheid en menslike begeertes om mense te mislei en hul dwaalweë te regverdig. Hulle minag God se gesag en huiwer selfs nie om teen geestelike wesens, soos engele, opstandig op te tree nie. Petrus beklemtoon dat selfs die sterkste engele nie lasterlike oordeel teen die duiwels voor God bring nie, terwyl valse leraars dit sonder skaamte doen. Net God kan oordeel. 

Hierdie gedrag moet ernstig opgeneem word, want dit wys op ‘n hart wat God se gesag verag en sy heilige dinge misbruik. Gelowiges moet waaksaam wees teen hierdie innerlike verderf van ander, maar ook binne onsself, sodat ons nie ons dade probeer goedpraat nie. Ons moet vas staan in die waarheid van God se Woord. Ons moet nie toegee aan die verleiding van valse leraars nie, maar eerder volhard in gehoorsaamheid aan en vertroue op God.

God se Woord dien hier nie net as ‘n waarskuwing teen valse leraars nie, maar ook as ‘n herinnering aan sy regverdige oordeel oor hulle. In 2 Petrus 2:4-10 sien ons hoe God nie verdraaiing en rebellie teen sy gesag duld nie. Selfs die engele wat teen Hom in opstand gekom het, is veroordeel tot Tartarus (die hel vir engele wat teen God gedraai het). Hierdie voorvalle dien as herinnering dat God sy heiligheid handhaaf en geen sonde ongesien en ongestraf laat bly nie.

Tog, te midde van die oordeel, wys God ook sy genadevolle redding aan die regverdiges. Noag en sy gesin is bewaar deur die vloed deur gehoorsaamheid en vertroue op God. So ook is Lot gered, alhoewel hy in ‘n verdorwe stad gewoon het. Hierdie verhale getuig van God se vermoë om die regverdige te bewaar te midde van oordeel.

Vir gelowiges vandag is hierdie verhale ‘n herinnering aan God se karakter. Hy is regverdig in sy oordeel en genadig in sy redding. Ons word aangespoor om nie ligtelik oor sonde te dink nie, maar om eerder ernstig te wees oor die heiligheid van God. Ons kan met vertroue tot God nader, wetende dat Hy bereid is om ons te red en te bewaar, selfs in tye van beproewing en oordeel.

Mag hierdie jou aanmoedig om die heiligheid en genade van God diep te waardeer en ‘n lewe te lei wat sy liefde en regverdigheid weerspieël in 'n verdorwe wêreld. Mag ons almal deur die krag van die Heilige Gees standvastig bly en nie wankel in ons geloof nie, maar eerder vas staan in die waarheid van Christus.

As bron gebruik: Ds. Vrey van die Gereformeerde Kerk Bellville se Whatsapp GBK Oordenkings groep.

Olielamp links: Die Olielamp Potgooi | Instagram | Facebook | Skryf vir ons! | Meer oor die Olielamp